Dielangana dia Meji pa Lumu
Luimpe lua Yone

No 13

Yesu udi udisha Bantu Binunu Bitanu

Tshisumbu tshinene tshidi tshilonda Yesu

 “Pakashika malu aa, Yesu wakaya dishiya dia dishiba dia Galela, didi dishiba dia Tibelia. Bantu ba bungi bakamulonda, bualu bua bakatangila bimanyinu biakenzeleye bena mabedi. Yesu wakabanda ku mukuna, wakashikamaku ne bayidi bandi. Kupita kua Yehowa, disanka dia Bena Yuda, kuakadi pa buipi” (Yone 6:1-4).

 Kudisha kua bantu binunu bitanu kudi umue wa bimanyinu mu Lumu Luimpe lua Yone bua kujadika ne Yesu wakadi Muprofete mulayibue mu Dipungila Dikulukulu (Dutelonome 18:15-19).

 Mukelenge Yesu wakondapa ba bungi bakadi ne masama a mishindu yonso, lumu luandi luakatangadika mu luseke luonso. Yone udi utuambila ne, Kupita kua Yehowa kuakadi pabuipi. Musangu mukuabo bantu bakuabo munkatshi muabo bakadi mu njila bua kuya ku disanka kudi misoko ya Isalele ne kuonso kuakadi Bena Yuda bashikame mu buloba, bilondeshile pa tshilele tshiabo.

 Pakatshiabu, Yesu wakambila bantu ne, “Tatu wanyi udi unupa bidia bilelela bia mu diulu. Bua bidia bia Nzambi mbiobio bidi bifuma mu diulu, bidi bipa ba pa buloba muoyo” (Yone 6:32,33). Kudisha kua bantu binunu bitanu kudi kutedibua mu Lumu Luimpe lua Matayo, Mako, Luka ne Yone. Kudi muanda munene mu Mukanda wa Nzambi. Yesu wakadi mulue bu Muana wa muntu bua kufikisha bantu kudi Nzambi.

Yesu udi ne bantu luse

 Yesu “wakatangila tshisumbu tshinene tshia bantu, wakadi nabo luse, bualu bua bobo bakadi bu mikoko yakadi kayi ne mulami; yeye wakabanga kubayisha malu a bungi. Pakamba diba kubuela, bayidi bandi bakalua kudiye, bakamba ne, Muaba ewu udi tshipela, diba diakumana kuya; ubatume, baye mu luseke elu ne mu misoko idi pabuipi, badisumbile bia kudia” (Mako 6:34-36).

 Yesu wakakonka Filipo ne, “Netusumbe mitanda ya bidia kudi kunyi, bantu aba badie? Wakamukonka nunku bua kumuteta munda, bua yeye wakadi mumanye bualu buakadiye pa kuenza. Filipo wakamuandamuna ne, Bidia bia mushinga wa ndenalio nkama ibidi kabiena bibakumbana bua muntu ne muntu kuangata anu bikese” (Yone 6:5-7).

 Mukelenge Yesu wakadi Muyishi muimpe, yeye wakebeja Filipo dikonka. Filipo wakamana kutangila bukole bua Yesu bua kusankisha bantu ba bungi ne bua kuondapa basame. Dituku adi ditabuja diandi diakadi dikese. Dituku dikuabo bapostolo ba Mukelenge bakamulomba ne, “Udiundishe ditabuja dietu” (Luka 17:5). Bakadi badiunda mu malu a Nzambi.

 “Muyidi wandi mukuabo, Andele, muanabo ne Simona Petelo, wakamuambila ne, Nsongalume mukese udi apa, udi ne mitanda itanu ya bidia bia seola (orge) ne mishipa ibidi; kadi bintu ebi ntshinyi tshienzelabi bantu bungi nunku? Yesu wakamba ne, Shikamishayi bantu. Mashinde a bungi akadipu. Nunku balume bakashikama, bakadi bu binunu bitanu” (Yone 6:8-10).

Bualu bua Andele

 Katuena tubala malu a bungi bualu bua Andele mu Mukanda wa Nzambi, kadi yeye wakadi mumanyibua bu muntu wakalua ne bakuabo kudi Yesu. Yeye wakalua ne muanabo Petelo kudi Yesu (Yone 1:40-42), ne pakadi Bena Gelika bakasua kutangila Yesu bakalua kudi Filipo, Filipo wakaya, wakambila Andele, Andele wakaya ne Filipo, bakambila Yesu (Yone 12:20-22).

 Andele wakamanya bualu bua nsongalume mukese ne mitanda ya bidia bitanu ne mishipa ibidi. Bidi bimueneka ne yeye wakalua nandi kudi Yesu ne bidia biakadiye nandi.

Bayidi ba Yesu badi bashikamisha bantu panshi pa mashinde

 Mukelenge Yesu wakambila bayidi bandi bua kushikisha bantu (Yone 6:10). Bakashikamisha bantu pa mashinde mu dilongolola dishiki.

 “Yesu wakamema mitanda; pakatendeleleye Nzambi, wakayabanyina bakadi bashikame, ne mishipa kabidi bungi buakadibo basue. Pakuukutabo, wakambila bayidi ne, Angulayi bipesa bia bidia bidi bishale, tshintu katshijiminyi. Bakabiangula nunku, bakuuja bisaka dikumi ne bibidi tente ne bipesa bia mitanda itanu ya bidia bia seola (orge) biakadibo bashiya kudi bakadia (Yone 6:11-13).

 Mbidi bimpe bua kuela Nzambi tuasakidila bua bia kudia bietu, “biakafuka Nzambi bua bantu badi ne ditabuja ne badi bamanye bualu bulelela badie ne kusakidila” (1 Timote 4:3).

 Bayidi bakuuja bisaka dikumi ne bibidi tente ne bipesa bia mitanda itanu ya bidia bia seola (orge) biakadibo bashiya kudi bakadia. Bapostolo bakadi dikumi ne babidi, kakuena ne mpata ne bakuangata bisaka dikumi ne bibidi bia bipesa bia mitanda bua makengela abo, musangu mukuabo bua kukuatshisha bakuabo kabidi. Mukelenge Yesu udi Mfumu muimpe !

Bantu badi basue kukuata Yesu bua kumubueja mu bukelenge

 Pakamanya Yesu ne, Badi bamba kunkuata ku bukole bua kumbueja mu bukelenge, Yesu wakabueja bayidi bandi mu buatu lubilu bua bobo kudianjila kuandi dishiya dia dijiba. Yeye wakashala bua kutuma bisumbu bia bantu kuabo, pashishe yeye wakuya ku mukuna kabidi, yeye nkayandi bua kutendelela (Tangila Yone 6:15. Matayo 14:22,23).

 Yesu wakamanya mitshima ya bantu, pakatshiabu, wakabambila ne, “Bulelela, bulelela, ndi nuambila ne, Kanuena nunkeba bua bimanyinu binuakutangila, nudi nunkebela bua nuakudia mitanda, nuakuukuta” (Yone 6:26).

Yesu udi uya ku mukuna nkayandi

 Bantu bakapidia Mukelenge Yesu bu Mutumibue wa Nzambi ne bakapidia bumanyisha buende. Mitshima yabo yakadi bikole be. Katuena ne mpata ne malu aa akanyingalaja mutshima wa Yesu, mulue mu luse bua kusungila ba pa buloba. Pakadiye pa buloba, yeye wakadi mumanyibue bu muena kanyinganyinga, wakamanya makenga (Yeshaya 53:3).

 Kadi bakuabo bakamuitabuja. Bakamuitabuja bu Kilisto, Muana wa Nzambi, ne bu Musungidi wabo. Dituku dikuabo, mu dilomba kudi Tatu wandi, Yesu wakamba ne, “Tatu wanyi muakane, ba pa buloba kabakamumanya, kadi meme nakakumanya; aba kabidi bakamanye ne, Wewe wakuntuma; nakubamanyisha dina diebe, nembamanyishedi kabidi, bua dinanga diwakunnanga nadi meme kuikaladi munda muabo, ne meme munda muabo” (Yone 17:25,26). Katuena tshintu tshidi ne bukole bua kutupandulula ku dinanga dia Nzambi didi mu Kilisto Yesu Mukelenge wetu (Lomo 8:39).

“Mu muanda ewu mudi dinanga, kembua tuetu tuakunanga Nzambi,
kadi bua yeye wakatunanga, wakatuma Muana wandi
bu mulambu wa kubuikila nawu mibi yetu.
Bananga, bikala Nzambi mutunange nunku,
tuetu kabidi, butudi nabu mbua
kunangangana” (1 Yone 4:10,11).