Dielangana dia Meji pa Lumu
Luimpe lua Yone

No 7

Nikodemo: Mulopo wa Bena Yuda udi ulua kudi Yesu butuku

“Muntu wa ku Bafalese wakadiku dina diende Nikodemo, yeye wakadi mulopo wa Bena Yuda; yeye wakalua kudi Yesu butuku, wakamuambila ne, Labi, tudi bamanye ne, Wewe udi muyishi mufume kudi Nzambi, bualu bua kakuena muntu udi mumanye mua kuenza bimanyinu ebi biudi wenza, bikala Nzambi kayi nandi. Yesu wakamuandamuna ne, Bulelela, bulelela, ndi nkuambila ne, Bikala muntu kayi muledibue tshiakabidi, kena mumanye mua kutangila bukelenge bua Nzambi. Nikodemo wakamukonka ne, Pakulumpa muntu, yeye udi mumanye mua kuledibua tshiakabidi munyi? Udi mumanye mua kubuela munda mua mamu wende tshiakabidi, amulele, anyi? Yesu wakamuandamuna ne, Bulelela, bulelela, ndi nkuambila ne, Bikala muntu kayi muledibue kudi mayi ne kudi Nyuma, yeye kena mumanye mua kubuela mu bukelenge bua Nzambi. Wakaledibua kudi mubidi udi mubidi; wakaledibua kudi Nyuma udi nyuma. Kukemi bua diyi dinakukuambila ne, Bunudi nabu mbua kuledibua tshiakabidi. Lupepele ludi lupepa kudilu lusue, wewe udi unvua tshiona tshialu, kadi kuena mumanye kudilu lufuma ne kudilu luya; muntu yonso udi muledibue kudi Nyuma udi nunku. Nikodemo wakamuebeja ne, Malu aa adi mamanye mua kuikala nunku munyi? Yesu wakamukonka ne, Wewe udi muyishi wa Isalele, kuena mumanye malu aa? Bulelela, bulelela, ndi nkuambila ne, Tudi tuamba butudi bamanye, tudi tuambila bantu butuakumona; nuenu kanuena nuitabuja butuakunuambila. Binuapidia kuitabuja malu a pa buloba anaku-nuambila, nudi bamanye mua kuitabuja binanuambila malu a mu diulu munyi? Kakuena muntu wakubanda mu diulu anu yeye wakufuma mu diulu, Muana wa muntu mene, udi biende mu diulu. Bu muakabisha Mose nyoka mu tshipela, nunku budi Muana wa muntu nabu mbua kubishibua muomumue; bua muntu yonso witabuja ikale ne muoyo wa tshiendelele bualu buende. Bualu bua Nzambi wakatamba kusua ba pa buloba, yeye wakabapa Muanandi umuepele mulela bua muntu yonso wamuitabuja kafu biandi, kadi ikale ne muoyo wa tshiendelele” (Yone 3:1-16).

Bafalese

  Bafalase bakadi bantu bakadi badieyemena ne, Tudi bakane, bakadi bapetula bantu bakuabo (Tangila Luka 18:9). Mukelenge Yesu wakambila bantu ne bayidi bandi ne, “Bafundi ne Bafalese badi bashikama mu nkuasa wa Mose; nuenze, nutumikile malu onso adibo banuambila; kadi kanuenji malu adibo benza; bualu bua bobo batu bamba, kadi kabatu benza” (Matayo 23:2,3). Pashishe Mukelenge wakabela bafundi ne Bafalase ne, “Nuenu bafundi ne Bafalase, nudi bena lubombo, mulawu ulualua kunudi, bualu bua nuenu nuinshidila bantu tshibi tshia bukelenge bua mu diulu; nuenu kanuena nubuelamu, kanuena nuitabuja bua bakuabo badi basue kubuela babuele!” (Matayo 23:13).

 Kadi muntu umue wakadiku, yeye wakadi Mufalase ne muntu munene munkatshi mua tulopo tua Bena Yuda, yeye wakadi ukeba kumanya bualu bulelela bua Yesu. Muntu ewu wakadi Nikodemo, muntu wakalua kudi Yesu butuku.

 Yeye wakambila Mukelenge ne, “Labi, tudi bamanye ne, Wewe udi muyishi mufume kudi Nzambi, bualu bua kakuena muntu udi mumanye mua kuenza bimanyinu ebi biudi wenza, bikala Nzambi kayi nende” (Yone 3:2).

 Nikodemo, bu muyishi wa Diyi dia Nzambi kudi Isalele, wakamanya bualu bua mukanda wa Yelemiya, mufunda kudi Bena Yuda pakadibo bapika mu bianza bia Bena Babulona bua malu mabi abo. Yelemiya wakafunda ne, “Yehowa udi wamba ne, Bua ndi mumanye meji andi nnuelela, adi meji a kunuvuija ditalala, kaena a kunvuija diyoyo; adi bua kunupa ditekemena mu matuku atshi kumpala. Nenumbikile, nenulue kuntendelela, ne nennuumvuile. Nenunkebe ne, nenumpete, panuankeba ne mitshima yenu mijima” (Yelemiya 29:11-13).

 Musangu mukuabo yeye wakalua mulondi wa Mukelenge Yesu bu Yosefe wa ku Alimataya, yeye kabidi wakadi mfumu wa Bena Yuda, kadi wakadi muyidi wa Yesu mu busokoko bualu bua wakadi ubatshina (Yone 19:38).

Tudi tubala bualu bua Nikodemo misangu isatu mu Mukanda wa Nzambi:

1.   Yeye wakalua kudi Yesu butuku bu mukebi wa bushuwa bua kumanya bua bualu buende (Yone 3:2).
2.   Nikodemo wakakuila Mukelenge Yesu pakapingana tupalayi, tutumina kudi bakuidi banene ne Bafalese bua kumukuata, tuakapingana kabayi nandi (Yone 7:50,51).
3.   Kunyima kua lufu lua Mukelenge pa mutshi mutshiamakane, Nikodemo wakalua bua kukuatshisha Yosefe wa ku Alimataya bua kulongolola tshitalu tshia Mukelenge bua kumujika bu muakadi tshilele tshia Bena Yuda (Yone 19:39-40).

Nikodemo kena mumanye mua kujingulula mudi muntu mua kuikala muledibua tshikabidi

Yesu wakambila Nikodemo:

1.   “Bulelela, bulelela, ndi nkuambila ne, Bikala muntu kayi muledibue tshiakabidi, kena mumanye mua kutangila bukelenge bua Nzambi” (Yone 3:3).
2.   Bulelela, bulelela, ndi nkuambila ne, Bikala muntu kayi muledibue kudi mayi ne kudi Nyuma, yeye kena mumanye mua kubuela mu bukelenge bua Nzambi” (Yone 3:5).

Nikodemo wakamuebeja ne, “Malu aa adi mamanye mua kuikala nunku munyi? Yesu wakamuandamuna ne, Wewe udi muyishi wa Isalele, kuena mumanye malu aa? (Yone 3:9,10).

Mayi adi tshimanyishilu tshia Diyi dia Nzambi

 Mupostolo Paulo wakafunda ne, “Balume, suayi bakaji benu bu muakasua Kilisto ekeleziya kabidi, wakadifila bua bualu buandi; bua yeye amujidile mumane kumulengesha ne kuvua kua mayi ne diyi diandi” (Efeso 5:25,26). Mukelenge Yesu wakambila bayidi bandi ne, “Katataka nudi balengeshibue bualu bua diyi dinakunuambila” (Yone 15:3). Paulo wakafundila bena ditabuja ba ku Lomo ne, “Diyi edi didi pabuipi nebe, didi mukana muebe mene ne mu mutshima webe; edi ndiyi dia ditabuja ditudi tuambila bantu. Biwajukula ne mukana muebe ne, Yesu udi Mukelenge, ne biwitabuja ne, Nzambi wakamubisha ku bafue, neusungidibue” (Lomo 10:8,9).

 Bidi ku mudimu wa Nyuma Muimpe mu mutshima wa muntu, ne ku diyi dia ditabuja tudi basungidibue. “Nunku ditabuja didi difuma ku diunvua ne diunvua didi bua diyi dia Kilisto” (Lomo 10:17).

 Mupostolo Petelo wakafunda ne, “Nunangangane mu mitshima yenu bikole; bualu bua nuakaledibua tshiakabidi, kenku bintu bidi bijimina, kadi ku bintu bidi kabiyi bijimina, ku diyi dia Nzambi udi ne muoyo ne udiku tshiendelele” (1 Petelo 1:22-23).

 Paledibua muntu, dina diende didi difunda kudi bulamatadi ne certificat de naissance udi upeshibue. Ewu udi document wa mushinga mukole. Padi muntu ulua muena Kilisto, ne udi muledibue tshiakabidi, dina diende didi difunda mu diulu, mu Mukanda wa Muoyo wa Muana wa Mukoko (Tangila Luka 10:20. Buakabuluibua 21:27).

Yesu budiye nabu mbua kufua pa mutshi mutshiamakane

 “Bu muakabisha Mose nyoka mu tshipela, nunku budi Muana wa muntu nabu mbua kubishibua muomumue; bua muntu yonso witabuja ikale ne muoyo wa tshiendelele bualu buende. Bualu bua Nzambi wakatamba kusua ba pa buloba, yeye wakabapa Muanandi umuepele mulela bua muntu yonso wamuitabuja kafu biandi, kadi ikale ne muoyo wa tshiendelele” (Yone 3:14-16).

 Mukelenge Yesu wakamana kuambila Nikodemo ne, Bunudi nabu mbua kuledibua tshiakabidi. Katataka udi umuambila ne, Bikala muntu mumanye mua kubuela mu bukelenge bua Nzambi, Yeye Nkayende budiye nabu mbua kuikala mubishibue, bu Mose wakabisha nyoka wa tshiamu tshia mitaku kulu kua mutshi (Nomba 21:8). Mukelenge Yesu udi wela meji bua mutshi wende mutshiamakane.

 Pakadi Bena Isalele mu luendu luabo ku buloba bua mulayi, bakajiana Nzambi ne Mose kabidi ne, “Nuakutulupuila mu Ejipitu bua kutufuisha mu tshipela nunku bua tshinyi? Kakuena bia kudia, kakuena mayi, ne bidia ebi bia tshianana biakututonda” (Nomba 21:5). Bidia biakabatondabo biakadi mana, bidia bia mu diulu. Bidi biamba bualu bua Mukelenge Yesu, “bidia bilelela bia mu diulu” (Tangila Yone 6:31,32).

 Bantu bakalengulula bidia biakadi bibatuminibua kudi Nzambi bua kubakuatshisha mu dikengela diabo; kulumbuluisha kuende kuakapona pamutu pabo. Nzambi wakatuma nyoka idi isuma bu kapia munkatshi muabo ne ba bungi bakafua. Bantu bakalua kudi Mose, bakamba ne, Tuakuenza bibi bualu bua tuetu tuakujiana Yehowa ne wewe kabidi, alombe Yehowa atumushile nyoka munkatshi muetu. Mose wakalombela bantu Nzambi. Yehowa wakambila Mose ne, Enza biebe nyoka ne mubidi bu kapia, umuteke kulu kua mutshi; nunku pamutangila muntu musumibue, neikale ne muoyo, Mose wakenza nyoka ne tshiamu tshia mitaku, wakamuteka kulu kua mutshi; pashishe pakatangila muntu musumibue nyoka wa tshiamu tshia mitaku, wakadi ne muoyo kabidi” (Nomba 21:7-9).

 Disuma dia nyoka diakadi lufu. Lulungu lua nyoka ludi tshifuanyikiji tshia bubi. Mukanda wa Nzambi udi wamba ne, “Difutu dia bubi ndufu, kadi dipa dia luse dia Nzambi mmouyo wa tshiendelele mu Kilisto Yesu Mukelenge wetu” (Lomo 6:23).

 Pakamba bantu ne, “Tuakenza bibi”, Nzambi, mu luse luende, wakalongola njila bua muntu musumibue kudi nyoka kuikala ne muoyo. “Pashishe pakatangila muntu musumibue nyoka wa tshiamu tshia mitaku, wakadi ne muoyo kabidi” (Nomba 21:9).

 Yone 3:16 udi mvese wa mushinga mukole. Udi utuambila bualu bua bunene bua dinanga dia Nzambi, ne bu mutudi mua kuikala basungidibue ku malu mabi etu, bua kuikala ne muoyo wa tshiendele. Tangila kudi Yesu bua lupandu. Tangila ne kuikala ne muoyo, udi mukenji wa Lumu Luimpe. Mukelenge Yesu wakalua bua bantu bapete muoyo, baupete muvule (Yone 10:10,11).

Yeye wakamba ne, “Bulelela, bulelela, ndi nuambila ne,
Unvua diyi dianyi, witabuja wakuntuma,
udi ne muoyo wa tshiendelele, kena ulua ku tshilumbu,
wakumuka mu lufu, wakubuela mu muoyo”
(Yone 5:24).